ស្លឹកតើយជាឈ្មោះប្រទាលមួយប្រភេទស្ថិតក្នុងពពួករំចេក ប៉ុន្តែរុក្ខជាតនេះស្លឹកវាមានពណ៌បៃតងស្រស់ មានក្លិនក្រអូបប្រហើរ និងគ្មានបន្លាដូចស្លឹករំចេកទេ ។ តាំងពីបុរាណកាលមកខ្មែរយើងតែងបានយកវាមកប្រើប្រាស់ដាក់ជាមួយ បង្អែមដើម្បីមានក្លិនក្រអូបប្រហើរនិងមានពណ៌បៃតងស្រស់ស្អាត ។ គេច្រើនដាំនៅក្បែរអណ្ដូងទឹក ឬតាមកូនប្រឡាយក្បែរផ្ទះព្រោះវាក៏ជារុក្ខជាតិត្រូវការទឹកខ្លាំងណាស់ដែរ ។
គុណប្រយោជន៍របស់វាក្នុងការប្រើប្រាស់ជាមួយបង្អែមមាន នំបាញ់ឌុក លត នំច័ក្កច័ន (ពពួកនំកូរមានស្រទាប់ត្រួតគ្នាចម្រុះពណ៌
ផ្សេងៗ) និងពេលខ្លះគេយកវាទៅដាក់លើបាយដែលកំពុងផ្ងំដើម្បីឱ្យមានក្លិនក្រអូបប្រហើរ ។
ក្រៅពីក្លិនស្លឹកតើយនៅបានផ្ដល់ពណ៌បៃតងយ៉ាងស្រស់ស្អាតទៀតផង ។ សព្វថ្ងៃនេះមិនថាតែខ្មែរយើងទេ ដែលយកស្លឹកតើយមកដាក់ជាមួយបង្អែមផ្សេងៗសូម្បីតែលើពិភពលោកស្លឹកតើយត្រូវបានគេយកទៅធ្វើជានំខេក (Cake) និងកិនធ្វើភេសជ្ជៈផ្សេងៗទៀតផងដែរ ។
មានខ្លះបានយកស្លឹកតើយទៅចាក់ក្បាច់ជាផ្កា និងធ្វើជាវត្ថុអនុស្សាវរីយ៍ផ្សេងៗ សម្រាប់ដាក់តាំងក្នុងបន្ទប់គេង ឬបន្ទប់ធ្វើការដើម្បីឱ្យមានក្លិនក្រអូបប្រហើរ ។
ស្លឹកតើយឈ្មោះតាមវិទ្យាសាស្ត្រ Pandanus amarylifolius Roxb ។ ក្នុងក្លិនរបស់ស្លឹកតើយមានសារធាតុ COUMARIN , Calcium, Protein, Carbohydrate, Fiber…។ ក្រៅពីអត្ថប្រយោជន៍ខាងលើ រុក្ខជាតិនេះ ត្រូវបានគេយកមកធ្វើជាឱសថព្យាបាលរោគផងដែរក្នុងនោះគុណប្រយោជន៍សម្រាប់ធ្វើជាឱសថមាន ការពារជំងឺបេះដូង,ស្លឹកយកមកដាំពិសាព្យាបាលគ្រុនផ្តាសាយ និងបំប៉ន កម្លាំង។
ចំណែកឫសរបស់វា យកមកដាំទឹក ពិសាជួយបញ្ចុះជាតិស្ករសម្រាប់អ្នកកើតជំងឺទឹកនោមផ្អែម,បំបាត់រោគទាស់នោម,ព្យាបាលរលាកក្រលៀន និងរលាកថ្លើម ។ ស្លឹកតើយមានក្លិននិងធ្វើឱ្យពណ៌ក្នុងចំណីអាហារស្រស់ស្អាតពិតជាមានគុណប្រយោជន៍ដល់សុខភាពគួរឱ្យចង់ទទួលទាន និងគេចផុតពីសារធាតុគីមីដែលគេតែងតែយកមកដាក់ក្នុងបង្អែមឬភេសជ្ជៈ ៕
ផ្លែប៊័រផ្តល់អត្ថប្រយោជន៍ ដល់សុខភាពអ្នកពិសារយ៉ាងច្រើនដូចជា…
ផ្លែប៊័រអាចនឹងមានផ្ទុកសារធាតុប្រេង ប៉ុន្តែ នេះមិនមែនមានន័យថា វាផ្តល់ផលមិនល្អ សម្រាប់សុខភាពនោះទេ ។ ជាការពិតណាស់ ផ្លែឈើនេះគឺជាឃ្លាំងស្តុកអាហារូបត្ថម្ភដែលផ្តល់នូវអត្ថប្រយោជន៍ចំពោះសុខភាពប្រកបដោយសក្តានុពល ។ សាច់ទន់ដូចជាក្រេមនិងពោរពេញដោយរសជាតិ ធ្វើឱ្យវាក្លាយជាគ្រឿងផ្សំក្នុងអាហារផងដែរ ។ ដោយសារតែសមាសធាតុខ្លាញ់ដ៏សម្បូរបែប ប៊័រក៏ត្រូវបានប្រើជំនួសសាច់នៅក្នុង Sandwich ទៀតផង ។
យោងតាមអត្ថបទមួយចុះផ្សាយក្នុងព្រឹត្តិបត្រ Medical News Todayបានវិភាគយ៉ាងល្អិតល្អន់ទៅលើសមាសធាតុអាហារូបត្ថម្ភរបស់ផ្លែប៊័រ ។ សមាសធាតុទាំងនោះមានដូចជាៈ
+សារធាតុប្រេងផ្តល់អត្ថប្រយោជន៍ដល់សុខភាព ៖ ប៊័រមួយផ្លែមានផ្ទុកសារធាតុប្រេងប្រហែលជា៣/៤នៃកាឡូរីសរុបរបស់វា ។
+ប្រូតេអុីន៖ ប៊័រមួយផ្លែជាមធ្យមផ្ទុកប្រូតេអុីនប្រហែលជា៤ក្រាម ។ នេះជាបរិមាណដែលច្រើនជាងផ្លែឈើដទៃ ។
+សារធាតុស្ករ ៖ បរិមាណជាតិស្ករក្នុងផ្លែប៊័រ បើធៀបទៅនឹងផ្លែឈើដទៃទៀតគឺទាបខ្លាំងណាស់ ។ ប៊័រមួយចំហៀងមានផ្ទុកជាតិស្ករ ប្រមាណជា ០,២ក្រាម ។
+បណ្តាវីតាមីននិងសារធាតុរ៉ែ ៖ ប៊័រគឺជាប្រភពដ៏សម្បូរបែបនៃរ៉ែប៉ូតាស្យូម ។ លើសពីនេះទៀត វាមានផ្ទុកវីតាមីន K វីតាមីន B9 វីតាមីន B6 វីតាមីន C វីតាមីន B5 និងវីតាមីន E ។
+សារធាតុសរសៃ ៖ ប៊័រមួយផ្លែជាមធ្យម ផ្ទុកសារធាតុសរសៃចំនួន១១ក្រាម ។ នេះជាចំនួនដែលស្មើនឹងពាក់កណ្តាលនៃតម្រូវការកម្រិតអប្បបរមាសារធាតុសរសៃប្រចាំថ្ងៃរបស់រាងកាយមនុស្សម្នាក់ៗ ។
អត្ថប្រយោជន៍សុខភាពរបស់ផ្លែប៊័រ ៖
ក្រៅពីជាប្រភពដ៏សម្បូរបែបនៃសារធាតុសរសៃនិងវីតាមីន ប៊័រផ្តល់អត្ថប្រយោជន៍មួយចំនួនទៀតដល់សុខភាពក្នុងនោះមាន ៖
១- កាត់បន្ថយកម្រិតខ្លាញ់កូឡេស្តេរ៉ូល ៖
ការស្រាវជ្រាវតាមបែបវិទ្យាសាស្ត្របានបង្ហាញថា ទទួលទានផ្លែប៊័រជួយបញ្ចុះកម្រិតខ្លាញ់កូឡេស្តេរ៉ូលអាក្រក់ ។ ការសិក្សាមួយដែលបានចេញផ្សាយក្នុងព្រឹត្តិបត្រ Archives of Medical Researchបានរកឃើញថា ដាក់បញ្ចូលផ្លែប៊័រក្នុងរបបអាហារប្រចាំថ្ងៃ អាចជួយឱ្យល្អប្រសើរដល់កម្រិតខ្លាញ់លីពីតជាពិសេសចំពោះអ្នកជំងឺលើសខ្លាញ់ ។ ការពិសោធដែលមានរយៈពេលមួយសប្តាហ៍បានបង្ហាញថាកម្រិតខ្លាញ់កូឡេស្តេរ៉ូលអាក្រក់និងខ្លាញ់Triglycerideរបស់អ្នកជំងឺលើសខ្លាញ់ដែលទទួលផ្លែប៊័របានថយចុះ ២២ភាគរយ ប៉ុន្តែ កម្រិតខ្លាញ់កូឡេស្តេរ៉ូលល្អវិញបានកើន១១ភាគរយ ។
២- កាត់បន្ថយហានិភ័យជំងឺទឹកនោមផ្អែម ជំងឺដាច់សរសៃឈាមខួរក្បាលនិងជំងឺសរសៃឈាមបេះដូង ៖
ការសិក្សាមួយដែលបានចុះផ្សាយក្នុងព្រឹត្តិបត្រ Nutrition Journal បានបង្ហាញពីការជាប់ពាក់ព័ន្ធគ្នារវាងការទទួលទានផ្លែប៊័រទៅនឹងជំងឺMetabolic Syndrome (ភាពច្របូកច្របល់នៃការប្រើប្រាស់និងស្តុកទុកថាមពលរបស់រាងកាយ )។ អ្នកវិទ្យាសាស្រ្តបានសន្និដ្ឋានថា ការទទួលទានផ្លែប៊័រត្រូវបានផ្សារភ្ជាប់នឹងការធ្វើឱ្យប្រសើរឡើងនូវគុណភាពរួមនៃរបបអាហារ ការប្រើប្រាស់អាហារូបត្ថម្ភនិងធ្វើឱ្យថយចុះហានិភ័យ Metabolic Syndromeផងដែរ។
៣-អាចជួយបង្ការជំងឺមហារីក ៖
វត្តមានដ៏សម្បូរបែបនៃសមាសធាតុphytochemicalsនៅក្នុងផ្លែប៊័រត្រូវបានអ្នកវិទ្យាសាស្ត្រអះអាងថា អាចជួយទប់ស្កាត់ការអភិវឌ្ឍរបស់ជំងឺមហារីក ។
សូមបញ្ជាក់ថា ផ្លែប៊័រក៏ផ្តល់ផលរំខានខ្លះៗដែរដល់អ្នកទទួលទានមួយចំនួន បើទោះផលរំខានទាំងនោះជាករណីកម្រក្តី ។ ដូច្នេះ ប្រសិនជាអស់លោកអ្នកជួបអាការៈដូចជា ក្អក តឹងច្រមុះ… សូមទៅពិគ្រោះជាមួយគ្រូពេទ្យ ៕
