ចោរមួយក្រុមនៅទីក្រុងមុំបៃ ក្នុងប្រទេសឥណ្ឌា បានលួចលុយពីធនាគាររដ្ឋមួយកន្លែង បន្ទាប់ពីពួកចោរបានជីកផ្លូវរូងក្រោមដីប្រវែង៨ម៉ែត្របានសម្រេច ដោយប្រើពេលជីកអស់ជាង ៤ ខែ។
ប៉ូលិសបានប្រាប់សារព័ត៌មាន BBC ថា សាច់ប្រាក់ និងគ្រឿងអលង្ការ ត្រូវបានចោរលួចយកទៅអស់រលីង ប៉ុន្តែតម្លៃគិតជាលុយសរុបប៉ុន្មាននោះ គេនៅមិនទាន់កំណត់បាននៅឡើយទេ។
ក្រុមអាជ្ញាធរជឿថា ក្រុមចោរនេះបានជួលអគារមួយនៅក្បែរធនាគារ Baroda ដើម្បីជីករូងក្រោមដីមកធនាគាររដ្ឋមួយនេះ។
ប៉ូលិសនិយាយថា ពួកចោរបានបើកហាងលក់គ្រឿងទេសមួយនៅជិតធនាគារដើម្បីបិទបាំងការធ្វើសកម្មភាពរបស់ពួកគេ។
ក្រុមចោរដែលគេសង្ស័យនេះបានបាត់ខ្លួនចាប់តាំងពីបានធ្វើសកម្មភាពលួចប្លន់ធនាគារនេះកាលពីយប់ថ្ងៃសៅរ៍សប្តាហ៍មុន។ គេមិនច្បាស់ទេថាតើមានមនុស្សចំនួនប៉ុន្មាននាក់បានជីករូងក្រោមដី អស់ជាច្រើនខែមកនេះ ដោយគ្មានការសង្ស័យសោះ។ ក្រុមចោរនេះមិនទាន់មានអ្នកដឹងអត្តសញ្ញាណនៅឡើយទេ៕
ប្រភព៖ប្រទេសឥណ្ឌា
