ការងារសាងសង់បានចាប់ផ្តើមដំណើរការចាប់តាំងពីឆ្នាំ ២០០៦។ ហើយទីបំផុត វាហាក់បីដូចជា សណ្ឋាគារ InterContinental Shimao នៅទីក្រុងសៀងហៃ ប្រទេសចិន កំពុងតែឆ្ពោះទៅរកដំណាក់កាលសំខាន់ជាលើកដំបូងនៃការបញ្ចប់ការសាងសង់។ នេះបើយោងតាមវីដេអូមួយ។
ថតដោយក្រុមមួយឈ្មោះថា Asia’s Pear Video ទស្សនីយភាពថ្មីៗបំផុតនេះ បានបង្ហាញផ្នែកខាងក្រៅនៃសំណង់សណ្ឋាគារ ដែលសល់ត្រឹម ៦ ខែទៀតប៉ុណ្ណោះនឹងសាងសង់រួចជាស្ថាពរនូវរមណីយដ្ឋានតម្លៃ ៤៥៧ លានដុល្លារនេះ នៅខែឧសភាឆ្នាំ ២០១៨។
បន្ទាប់ពីការខិតខំប្រឹងប្រែងអស់រយៈពេលជាច្រើនឆ្នាំពីសំណាក់ក្រុមកម្មករសំណង់ចំនួន ៥.០០០ នាក់ គម្រោងដ៏អស្ចារ្យនេះត្រូវបានគេមើលឃើញថា ចាប់ផ្តើមលេចរូបរាងស្រដៀងទៅនឹងប្លង់គូរដោយវិចិត្រករដើមនៃអាគារនេះហើយ ដែលបានដាក់បង្ហាញជាលើកដំបូងក្នុងឆ្នាំ ២០០៦។
ពីមុនត្រូវបានគ្របដណ្តប់ទាំងស្រុងដោយសំណាញ់សុវត្ថិភាពពណ៌បៃតងនិងជើងរន្ទារជាច្រើននោះ ឥឡូវទាំងអស់នេះចាប់ផ្តើមដកចេញបន្តិចម្តងៗ រំលេចចេញនូវវ៉េរ៉ង់ដា ដែលអាចមើលឃើញដល់បឹងសិប្បនិម្មិតមួយនៅខាងមុខ។
វីដេអូថតដោយដ្រូន ដែលបានចេញផ្សាយថ្មីៗនេះ បានបង្ហាញអំពីការរីកចម្រើនដ៏គួរឱ្យកត់សម្គាល់សម្រាប់សំណង់ស៊ីវិល័យនេះ ដែលដំបូងឡើយអ្នករៀបចំផែនការរំពឹងទុកថានឹងបានបញ្ចប់ជាស្ថាពរក្នុងឆ្នាំ ២០១៤។ ឥឡូវរបាយការណ៍របស់ Pear Video បានរាយការណ៍ថា អគារនេះនឹងបើកដំណើរការនៅរដូវក្តៅឆ្នាំ ២០១៨។
សំណង់ស្មុគ្រស្មាញនេះត្រូវបានរចនាឡើងដោយក្រុមហ៊ុនអង់គ្លេស Atkins ហើយនឹងមានបន្ទប់ភ្ញៀវចំនួន ៣៧០ បន្ទប់នៅជាន់ទាំង ១៩ របស់ខ្លួន ដែលនឹងត្រូវស្វាគមន៍ភ្ញៀវដែលជាអ្នកធំមានលុយមានអំណាចរបស់ចិន។
សំណង់នេះនឹងមានពីរជាន់នៅលើដី និង ១៧ នៅខាងក្រោម ប៉ុន្តែពីរជាន់ក្រោមគេបង្អស់នឹងស្ថិតនៅក្រោមទឹក និង មានភោជនីយដ្ឋាននិងបន្ទប់ទទួលភ្ញៀវក្រោមទឹកធ្វើពីកញ្ចក់ផងដែរ៕
