ថ្មីៗនេះ អាជ្ញាធរខេត្ត Dak Nong ប្រទេសវៀតណាម បានរកឃើញផ្លែទុរេនជ្រលក់ថ្នាំគីមី ដែលគិតជាទម្ងន់សរុប១១តោន នៅទីតាំងលក់បោះដុំមួយកន្លែងក្នុងខេត្តភាគកណ្ដាលប្រទេសមួយនេះ។
ប៉ូលិសបានរកឃើញផ្លែទុរេន ១១តោន ក្នុងចំណោមទុរេនសរុប ១៨តោន កំពុងត្រូវបានគេជ្រលក់ថ្នាំគីមី នៅទីតាំងហាងមួយនោះ ដោយទុរេនទាំងនោះត្រូវបានរៀបចំត្រៀមនឹងចែកចាយបន្តទៅទីផ្សារមួយចំនួនក្នុងខេត្ត Dak Nong។ ប៉ូលិសក៏បានប្រទះឃើញ និងដកហូត ម្សៅគីមីពណ៌លឿងចំនួន ២៣គីឡូក្រាមនៅទីតាំងកើតហេតុ ព្រមទាំងទឹកថ្នាំគីមីពណ៌លឿងស្អុយៗជាច្រើនធុងក្នុងហាងផងដែរ។
ម្ចាស់នៃហាងលក់បោះដុំទុរេនជ្រលក់ថ្នាំគីមីនេះ មានឈ្មោះថា Bui Phu Ton បានសារភាពថា ហាងរបស់ខ្លួនបានបើកដំណើរការរកស៊ីជាង ១ខែហើយ ដោយបានប្រើប្រាស់ថ្នាំគីមីចំនួន ៣ប្រភេទ ដើម្បីធ្វើឲ្យរូបរាង និងពណ៌ទុរេនមានសភាពល្អ។ ម្ចាស់ហាងរូបនេះក៏បានបញ្ជាក់ទៀតថា ហាងរបស់ខ្លួនលក់ទុរេនទាំងនេះដាច់ជាមធ្យមចន្លោះពី ១០ ទៅ ១៥តោន ជារៀងរាល់ថ្ងៃ។ នៅវៀតណាម កាលពីដើមខែនេះ ក៏មានការចាប់ខ្លួនម្ចាស់ហាងលក់បោះដុំទុរេនមួយកន្លែងផងដែរ ក្នុងខេត្ត Kon Tum ជាប់ពាក់ព័ន្ធនឹងរឿងជ្រលក់ថ្នាំគីមីធ្វើឲ្យទុរេនឆាប់ទុំ៕
ប្រភពៈ វៀតណាម
