រូបភាពនៃកុមារជនជាតិចិនពីររូបដែលបានធ្វើដំណើរចម្ងាយ ៨០គីឡូមែត្រនៅក្នុងប្រឡោះកង់រថយន្តក្រុងមួយគ្រឿង បានបង្កឱ្យផ្ទុះកំហឹងយ៉ាងខ្លាំងអំពីសុខុមាលភាពរបស់ក្មេង “ដែលត្រូវគេទុកចោល” ក្នុងប្រទេសមួយនេះ។
ក្មេងដែលមានវ័យ៨ និង៩ឆ្នាំដែលមិនត្រូវបានបញ្ចេញឈ្មោះដោយប្រព័ន្ធផ្សព្វផ្សាយរដ្ឋទាំងពីរនាក់នេះ គឺមកពីភូមិក្រីក្រមួយស្ថិតក្នុងតំបន់ភាគខាងត្បូងតំបន់ស្វយ័តក្វាងស៊ីជាប់ប្រទេសវៀតណាម ហើយបានព្យាយាមទៅជួបជាមួយនឹងឪពុកម្តាយរបស់ពួកគេ ដែលបម្រើការងារក្នុងខេត្តក្វាងទុង។
ពួកគេត្រូវបានគ្រូរបស់ពួកគេរាយការណ៍ថាបាត់ខ្លួនកាលពីថ្ងៃទី២៣ ខែវិច្ឆកា ហើយត្រូវបានប្រទះឃើញក្នុងថ្ងៃដដែលនៅក្រោមប្រឡោះកង់ឡានមួយគ្រឿងនៅឯចំណតរថយន្តក្រុង។
រូបភាព និងវីដេអូបានបង្ហាញពីទិដ្ឋភាពរបស់ក្មេងទាំងពីរប្រឡាក់ទៅដោយភក់ និងកំពុងព្យាយាមតោងផ្នែកខាងក្រោមនៃរថយន្តក្រុងនេះដើម្បីទៅជួបឪពុកម្តាយព្រោះតែពួកគេនឹកខ្លាំងពេក៕
